Endeleg løysna det att!

Tormod, Asle og Ove reiste frå Sogndal ca halv fire på fredags ettermiddag. Asle posterte seg på Brehaugadn, Tormod i Ali og Ove ved Vetleløa. Då Tormod hadde vore i Ali ein times tid høyrde han at det kom dyr mot han men dyra snudde like før han fekk sett dei.

Laurdagsmorgonen var det meininga at karane skulle til Myrhaug men eit offseleg vær sette ein effektivt stoppar for dette, i staden blei det felling av trær og kløyving av ved. Då ein var ferdig med dette, og selet var klargjort, vart det heimover att. Planen var no først å jage Åreskrea og deretter å postere på Fremstamarki for å sjå om det skulle kome kome dyr her på kveldinga.

Ove posterte ved Bjødnasteinen, framom Åreskrehola, medan Tormod og Asle gjekk heim for å sjå om dei kunne løyse dyr i skrea. Det hadde ikkje gått lang tid før Tormod kom inn på radioen og sa at han hadde løyst dyr, samtidig kom Asle innpå og sa at han også hadde sett dyret og at det var ein bukk. Ove såg etter ei lita stund eit dyr som kom framover og hadde retning under Bjødnahammaren men så forsvant det for han. Etter endå ei lita stund fekk Ove auge på bukken att og no var den rett over han og nærma seg faretruande skogen framom Bjødnasteinen, men bukken blei felt den og jaktdøgnet enda godt for karane.